ГАЛЕТ СО ДОМАТИ И КИСЕЛА ПАВЛАКА

Во сад се мешаат брашното, шеќерот, солта и путерот. Постепено се додава ладната вода и се замесува мазно тесто. Тестото се прекрива со фолија за свежа храна и се остава во ладилник 30 минути. Од тестото на хартија за печење се расукува кора во кружна форма со дебелина од 1 см. Во средината се нанесува претходно подготвениот фил од кисела павлака измешана со копар, лук, кашкавал и маслиново масло. Филот се нанесува внимателно со помош на лажица, оставајќи по 2 см од краевите. Врз филот се редат претходно исечканите домати на кругови. Краевите од кората се превиткуваат навнатре и се премачкуваат со изматено јајце. По желба, може да се нароси морска сол. Вака подготвениот галет се пече 30 минути на температура од 200°С.